周吉佩 近年歌唱事業如日中天，不過日前佢就暫時放下歌手光環，甘願降格做「助手」！因為佢 7歲嘅愛子 Jasper獲邀為時裝品牌行騷，化身小Model嘅Jasper登上伸展台，而廿四孝爸爸吉吉則全程陪伴在側，更親力親為囝囝擔任「專屬髮型師」與跟班，仲幫阿仔影咗唔少型仔相！
Jasper當天身穿潮裝亮相，喺伸展台上毫無怯場，行Catwalk時步伐自信、台風超穩，擺Pose更是有模有樣，小小年紀已展現出十足星味。而喺後台嘅吉吉，則全程跟前跟後照顧囝囝，更親自上手為Jasper吹頭梳理髮型，動作有模有樣、非常專業！絕對係全場最星級嘅「貼身跟班」。
除咗喺後台為Jasper忙前忙後外，完騷後吉吉又為囝囝影咗唔少型仔相，吉吉喺社交平台分享自己嘅傑作，並於帖文中寫道：「今日我又出動做助理，為我老闆Jasper化妝set頭、影相拍片，老闆好叻叻，行show非常專業！😉」佢仲喺帖文尾加上「專業跟班」嘅Hashtag。唔少網民都讚Jasper繼承咗爸爸嘅優秀基因，仲話Jasper已經可以出道呀！
