張頴康 喺啱啱大結局嘅劇集《夫妻的博弈》中飾演世紀大賤男施繼威阿Mark，演活賤到出汁又無賴嘅渣男一面，激到觀眾都想反問兩位女主角高海寧、郭柏姸「點解要爭咁嘅垃圾？」
不過喺現實生活中嘅阿康就完全相反，係一名顧家好男人，同老婆麥雅緻結婚多年仍然恩愛，更育有三名小朋友。而適逢假日，阿康就同老婆以及仔女齊齊入長洲好好玩一玩，就連愛犬都有隨行。
阿康更喺社交平台分享多張玩樂照，寫道：「今日突如其來有個一日嘅假期！當然要把握機會同一家人出去玩啦！一家人去玩！當然唔少得Master啦！小蛋黃第一次拖Master行街街！終於呢一次去長州，唔需要拎BB車啦！」文末仲標註「今日遇上好多熱情觀眾」，有喺長州偶遇阿康一家嘅市民留言：「有幸今日經過見到你哋☺️ 歡迎黎到長洲呀」，亦有觀眾留言「睇完你套戲真係覺得你好賤呀😂😂～係好好笑至真， 同你現實好男人😍真係反差太大了」對阿康嘅演技表示欣賞。