錢嘉樂 同 湯盈盈 作客今集《一周星星》，有傳當年係盈盈大膽女追男，節目組更搵到一段盈盈拍攝劇集《阿旺新傳》以醜女阿好造型受訪嘅片段，當時嘉樂行過，仲笑指：「你參加港姐攞梗冠軍！」而盈盈就問：「你會唔會同我拍拖？」盈盈表示當年不斷有記者同佢講嘉樂單身，至於「女追男」傳聞，佢就話只係傳聞而已喎。
兩人喺2001年《封神榜》中飾演楊戩同狐狸精柳琵琶，更有一場係三眼仔怒踢柳琵琶，回顧返呢一幕時，嘉樂都話：「《封神榜》好睇之處係劇裡面我收佢，喺現實中佢收返我。」
《一周星星》星期日晚 21:30 翡翠台