陳漢典 陳庭妮 日前亮相第61屆金鐘獎主持人公佈記招，呢次漢典同庭妮分別擔任節目類主持人同戲劇類主持人，漢典更係接老婆Lulu棒，所以佢嘅心情既期待亦緊張。漢典就話當佢接到邀請時第一時間同老婆分享，Lulu覺得呢個時間點實在太好，所以鼓勵佢答應邀請，仲話好期待佢同庭妮嘅表現添。
呢次記招係庭妮產後首度公開現身，庭妮就話，做咗媽媽後時間變得破碎，不過對住BB完全冇陌生感，加上同老公胡宇威都係準備好迎接新生命，所以認為囡囡嘅到來係最好嘅事。至於囡囡似媽媽多啲定係爸爸多啲？庭妮笑言自己嘅基因比較懶，囡囡似爸爸多啲。不過最好笑係，當庭妮話囡囡唔難湊時，漢典講咗句「感覺是天使寶寶」，令庭妮好尷尬話，保姆提醒最好唔好講呢句，令漢典都即刻講對唔住。
漢典同Lulu婚後，不時就會被問到造人進度，呢日都唔例外。漢典就話一切交由上天安排，佢哋屋企開放自由報名，男女不拘、人數不限，如果有BB覺得佢哋屋企好玩想嚟，都無任歡迎。雖然漢典對呢種問題做好準備，答得搞笑，但都聽得出佢好無奈。
