《中年好聲音4》動物歌手「企鵝人」周志康、「獅子王」羅天宇、「貓女郎」劉佩玥、「白羊君」姚兵、「白眉鷹王」莫家淦、「樹熊公子」黃建東將於9月底喺麥花臣場館開騷，經製作團隊多番商議後，胡鴻鈞、吳業坤、谷婭溦、關楚耀、劉威煌、趙浚承等星級嘉賓將會現身，以歌聲為呢六位動物歌手打氣。
當周志康、羅天宇、劉佩玥、姚兵、莫家淦、黃建東知道呢六位歌手助陣，感到相當興奮，急不及待與音樂總監開會，傾吓合唱環節上點樣配對，希望能夠帶畀觀眾嶄新嘅感覺。
胡鴻鈞覺得好榮幸可以參與呢個音樂會，「有一種好特別嘅感覺，同呢6位歌手藝人已相識一段時間，睇到佢哋今次有屬於自己嘅舞台，替佢哋高興，亦替支持佢哋每一位歌迷、家人及朋友開心。今次可以喺佢哋音樂會合作，相信會係一次好難忘嘅經歷，希望當晚佢哋玩得開心，創造屬於佢哋美好回憶，享受喺舞台上每分每秒。祝福佢哋以最佳狀態呈現給入場嘅每位觀眾。」
坤哥好開心有份做嘉賓，自己同天宇、康康、Moon Moon 同東東係一齊喺唔同劇集、唔同綜藝，以及喺選秀節目一齊成長，今次大家兜兜轉轉由演戲、主持變成唱歌，大家走嘅路相似，亦有共鳴，「演藝人生係冇終點，最緊要只要你繼續行落去，你想做嘅事都一定會實現。大家同輩，大家為自己喜歡嘅事情奮鬥，希望喺未來十年、二十年、三十年都可以一齊互相扶持」。
谷婭溦曾為《中聲4》客席評審，與羅天宇、周志康、莫家淦、黃建東係相處好多年嘅朋友，「羅天宇係演員，周志康、莫家淦、黃建東係做主持，佢哋一直冇太多機會去唱歌，最後透過《中年好聲音》呢個節目，以一個歌手身份去做佢哋最喜歡嘅事，替佢哋開心。我自己亦係歌唱比賽出身，所以佢抱住同理心支持大家參加比賽，希望無論入行幾多年，希望大家一齊努力繼續向前行。
關楚耀非常期待今次演出，「看到佢哋六人努力，絕對值得大家學習同支持」， 《中聲2》劉威煌話今次音樂秀嘅六位歌手喺演藝路已走咗一段時間，「包括我在內，大家都渴望睇到佢哋舉行音樂會，累積落嚟嘅經驗，絕對會令今次音樂會精彩及令人期待，而最大感觸嘅係由《超級巨聲》便已認識阿康，喺呢17年內睇到佢不斷喺演藝事業上嘅付出，至今可以踏上音樂會舞台以一個專業歌手身份做表演，真係好感動。今次我作為嘉賓及佢哋朋友，我會做足100%準備，相信呢個舞台絕對令到佢哋有所發揮同享受。佢哋比賽過程中一定會緊張，好大機會未能發揮到100%，但表演就不一樣，相信佢哋一定會非常出色」。
《中聲3》趙浚承作為過來人好明白佢哋感受，「呢6位動物歌手由《中聲4》一步步行到今日企喺呢個舞台上，佢咃本身已經有其他演藝工作，仍然願意跨出舒適圈，呢份熱誠真係值得大家支持，好佩服佢哋從未停低腳步，呢份不放棄嘅態度先係最珍貴。特別想支持莫家淦同周志康，一位係香港明星足球隊多年隊友，睇住佢自資做歌，見證莫家淦對唱歌嘅熱誠。另外就係阿康，而家係《愛回家之三代同糖》辦公室同事，佢哋實力有目共睹，所以我相信未來佢哋都會更好」。
