戀愛真人騷《女神配對計劃2》一開播即引爆話題，日前播出海選中嘅「花生」片段，唔少觀眾睇完都讚今季嘅「求愛勇者」相當高質，其中最吸睛嘅「求愛勇者」非26歲的方智弘（Oscar）莫屬！
擁有葡萄牙、芬蘭及香港三國混血基因嘅Oscar，五官深邃立體，更被指撞樣TVB男神吳偉豪。不過最令觀眾估佢唔到嘅係，呢位超高顏值嘅混血型男，正職竟然係一名「冷氣技工」，片段播出後瞬即被網民封為「全港最靚仔冷氣技工」！
重溫《女神配對計劃2》參考者勇敢求愛
Oscar喺節目中透露，自己喺18歲時入行，無論是窗口式、分體式定係天花中央冷氣，安裝與清洗都難佢唔倒，睇到 關嘉敏 當場「流晒口水」，話想睇對方洗冷氣。
節目播出後，各地都出現壞冷氣情況，網民紛紛留言：「馬上全香港的冷氣都壞晒」、「大灣區冷氣都壞埋」、「深圳要洗冷氣」、「哇塞，好靚仔！過來廣州洗冷氣」，亦有人睇好Oscar：「2368個粉絲，預判一個月後至少翻10倍」、「郭富城未做藝人前，都係冷氣技工啊，所以加油」。當然亦有人深挖呢位「最靚仔冷氣工」嘅背景，原來Oscar係二人男子組合 OneUp 嘅成員，更曾奪得「叱咤樂壇生力軍組合歌手銅獎」。
