張與辰日前為一個品牌活動擔任星級嘉賓，吸引唔少辰粉到場支持，張與辰於健康講座上，分享自己點樣喺繁忙嘅演藝生活之中，保持健康與狀態，每日有好多工作要做，有時外出工作，難免要會食到比較多油、多鹽、多糖嘅食物，食啲簡單保健產品打好底，長久健康先可以繼續產出好嘅作品回饋樂迷。
張與辰又與樂迷玩遊戲，佢先後兩個回合勝出，講到獻唱《迷戀有害》時，未知係咪太緊張，竟然兩度忘記歌詞，追求完美嘅張與辰要求重唱，樂迷見到佢可愛又專業嘅表現，一齊大合唱，瘋狂歡呼「Encore」，張與辰即場清唱，現場猶如小型音樂會，氣氛熱烈又融合。
張與辰於活動後受訪，透露自細已被失眠問題困擾：「我11歲開始已經失眠，試過做好多運動，都係瞓到半個鐘，到大半夜先瞓得着，所以我會從飲食同保健品方面調理身體。之前病過入院，見過鬼都怕黑，而家出街起碼飲10支水，成日去廁所。」
張與辰今年中秋將去加拿大工作，10月回家與屋企人見面：「直到我生日先可以再搞歌迷聚會，因為佢哋話好鍾意玩Cosplay，我哋已經好今年要用中世紀做主題，我連劍都準備好。」張與辰笑言考慮為打扮得最漂亮嘅樂迷，送上公主抱。