《中年好聲音4》冠軍 尹景順、亞軍 許雲妮、季軍 鄭家聲 連同 蔡宓婕、 吳亦偉、 尤淑情 和 許美琪 四位終極 七強現身畢業演唱會記招，宣佈佢哋十月開Show嘅好消息，而喺記招上更公佈 周志康 、 鄭仲豪 、 陳旭培 會加入開Show陣容，十強將集結相遇舞台，七強歌手亦輪流喺記招獻唱，為演唱會造勢。
雖然距離開Show仲有個幾月時間，不過咁多位中聲4歌手都已經好期待！至於表演環節會唔會有唱跳部分？鄭家聲就話佢都好希望有，不過要同團隊再討論。而尹景順目前開始籌備新歌，但佢就話宜家先開始聽Demo，到時開騷未帶得上舞台俾大家聽住。
宓婕同亦偉認為開騷同比賽嘅踏台心情好唔一樣，宓婕笑言希望五位評審到時唔好坐喺台下或者佢哋可以見到嘅地方，因為比賽咁耐一見到評審喺台下就會緊張，至於亦偉就話，評審們應該一人唱一首歌。
美琪同淑情早前喺完成賽事後講過終於可以唔洗戒口，但而家要籌備演唱會，美琪就話自己要開始投入減肥階段，不過淑情就因為已經習慣咗節制飲食，所以唔需要刻意減磅同戒口。
