舞台王者 郭富城 呢日以馬年大使身份，出席沙田馬場嘅活動，城城除咗演繹咗佢首經典快歌之外，呢日佢仲首度獻唱新歌《衝衝衝》，火力全開嘅城城，以勁歌熱舞炸爆舞台，亦令全場馬迷熱血沸騰呀。城城話呢首單曲亦係馬會嘅主題曲，雖然首歌無馬字，但就將馬嘅精神寫喺入面，代表遇到咩困難，都要朝住目標勇往直前。
除咗馬季開鑼，城城嘅囡囡亦都開學啦，早前佢兩位千金就被捕獲入讀頂級國際學校，除咗每年學費高達40萬之外，仲成為劉德華千金嘅師妹，城城仲講笑話跟得華仔嘅選擇就一定唔會錯啊﹗
城城工作咁忙，所以平時都無時間，參與兩個女嘅學校活動，不過，今年嘅暑假，佢終於可以唔駛做嘢，帶一家大細遊新加坡，佢都話好開心亦好難忘。而享受完天倫樂嘅城城，又要開始全情投入工作啦，呢日佢仲預告年底會喺啟德舉行跨年倒數演唱會，佢仲話為呢個演唱會會付出一切添。