張衞健（Dicky）出道幾十年來經歷過高低起伏，當年落難時曾接受他人幫助，Dicky後嚟積極回饋社會，加上Dicky喺《西遊記》嘅孫悟空形象一直深入觀眾心，尤其係「大聖爺」對一眾猴子猴孫疼愛有加。跳出戲外，Dicky唔只愛錫粉絲，仲好暖心好有義氣！
近日有人喺社交平台出Post發問：「哪一個偶像是支撐你走過低潮的呢」，吸引唔少粉絲留言分享與偶像相處嘅故事，有人留言「國中被霸凌很痛苦的時候遇見了AKB48，成為了帶我走過那段時期的救贖」、「張學友陪我渡過31年和往後的每一天！我的整個人生都是學友」，有人鬼馬分享佛像同紙幣圖像，不過就有一位Dicky嘅粉絲撰文，分享Dicky為佢嘅朋友所做嘅事，非常感人。
粉絲「dickyjesscheungfanpage」就話：「張衞健，幸好全程從頭到尾都有佢陪伴，冇諗過連最後嘅扶靈火葬都做埋。雖然低潮算唔上，但一定係人生最難捱過嘅日子，仲專登重錄清唱咗十幾首，朋友想聽，但佢有N年冇唱過嘅歌俾佢聽，朋友去唔到睇佢嘅演出，錄晒片俾朋友睇。短短一年朋友生病➡️做手術➡️康復期➡️突然惡化➡️疼到冇藥救➡️沉睡中等待離開➡️回歸天國➡️告別儀式。介紹大神父幫忙，關心朋友的家人。當佢再次踏上舞台唱身體健康，仲特意手向天一指，話送俾朋友聽。諗返起嗰時真係好難受好難捱，感謝張衞健。」
唔少網民睇完呢篇短文覺得好感動，仲紛紛留言大讚Dicky人品好，做事不求回報，果然係至情至聖，亦有人話「近年佢比較低調，原來佢咁有心」，粉絲回覆指Dicky一直有做慈善，只係低調唔講，最後佢再分享一件事，「有粉絲的爸爸急須眾籌做手術，佢知道都即刻捐款了，雖然最後都係太嚴重走了」，令大家再了解到Dicky行善嘅低調作風。