73歲B哥哥鍾鎮濤日前聯同楊謹華及劉以豪強勢合體組成「跨世代武林三巨頭」，三人打破常規，首度以英氣逼人嘅「古裝武俠」造型現身拍攝廣告。B哥哥近年依然保持殿堂級狀態，喺廣告中身穿一襲氣勢磅礴嘅宗師袍，一出場便帶有「武林盟主」嘅強大氣場。
B哥哥透露呢次會答應接拍廣告，背後原來藏有一段鮮為人知嘅「神兵療傷」故事，B哥哥回憶：「因為之前溫拿舉行告別巡迴演唱會廣州站嗰時，舞台上啲乾冰太濕滑，我就不小心跌倒，當場整傷咗「膝頭哥」同埋髖關節。演唱會之後，其實我一直有做物理治療,但膝蓋關節啲傷勢一直好反覆，始終未完全康復，至有時會影響埋我日常走動。」B哥哥後嚟接受Pilates訓練，喺專業教練指導下，進行深層肌肉訓練，竟然奇蹟般幫助咗佢全身嘅骨骼同關節健康重建，連原本勞損僵硬嘅膝頭哥都「好返晒」，而家靈活自如！
B哥哥年屆73歲起初擔心做唔到一啲高難度嘅拉筋動作，但在器械及教練嘅配合下，B哥哥簡直儼如一位武林高手，做甚麼動作都揮灑自如，而B哥哥健康體魄，亦得到廣告商垂青，誠邀B哥哥擔任今次產品代言人。
楊謹華一直係B哥哥好朋友，能夠與老友一齊拍廣告，B哥哥份外開心：「我同謹華好老友，今次能夠同佢一齊拍廣告，真係正。至於劉以豪就真係第一次合作，同我一樣又靚仔又高大，哈哈哈！本來廣告商想我演一個霸道總裁，但我就覺得武林高手好玩啲，因為我好少拍武俠片，想做大俠過吓癮。」
