陳曉華主演嘅新劇《死有對証》正式開播，Hera連日嚟亦積極出席宣傳活動。不過喺星期一（9月7號），Hera喺商場活動就遇上激動狂迷，雖然Hera疑似受驚而眼泛淚光，但佢一個舉動就得到網民大讚有港姐智慧、EQ非常高。
從網民分享嘅片段可見，當時活動吸引大批粉絲支持及途人圍觀，Hera喺準備離場時突然有一位身形魁悟嘅灰衫大叔激動向前推撞，繼而同另一位身穿粉色衫嘅男士發生肢體衝突，即使在場保安當場阻止，粉衫男士最後被推跌在地。
Hera雖然因衝突疑似眼濕濕，但佢亦表現得處變不驚，喺工作人員保護上前了解並想出言勸阻平息紛爭，不過灰衫大叔見到偶像情緒更激動，大叫「Hera」後再企圖靠近，並表示自己想合照及遞上禮物，經工作人員協調及Hera溫和安撫後，大叔情緒稍微冷靜，最後Hera喺工作人員保護下，同呢位大叔合照。
影片喺社交平台瘋傳後，唔少人大讚Hera EQ高，化解方式都好有港姐風範，不愧係港姐冠軍，而Hera亦以短訊回應傳媒，表示「最緊要大家都冇事」，有人認為Hera唔應該同大叔合照，因為擔心有人會「有樣學樣」，喺追星現場為達目的而吵鬧，更有人重提官恩娜被狂迷強吻一事，認為工作人員需要小心。
