Eric Kwok、森美同李茵彤主持嘅節目《唱錢》眨吓眼就播出最尾一集，台前幕後聯同有份上節目挑戰嘅歌手朋友一齊出席慰勞宴睇節目。
森美直認唔捨得節目同Desta嘅笑容，話Desta笑容由《唱錢》伸延到大家可以晚晚喺《愛．回家之三代同糖》見到佢，所以《唱錢》唔使再做，仲話Eric Sir應該加入《愛．回家之三代同糖》同車婉婉合作，佢自己就加入做Eric Sir嘅阿仔，Desta聞言話做仔有啲爭議。
《唱錢》最終回當然有彩蛋環節，森美上埋台挑戰Level 1，話事前用咗近半個月準備，不停翻睇《今期流行》，佢自覺唱功未必係好，不過舞蹈就跟得上古天樂，加上喺節目有彭家賢同侯雋熙伴舞，令整個演出增添可觀性。
Eric Sir同樣唔捨得節目結束，不過佢就好開心，因為節目令好多人嘅聽覺變得敏銳，分得出音準，佢當然想節目長做長有，因為台前幕後付出好多。Eric Sir話唔捨得《唱錢》心情等同唔捨得XiX，而XiX成員早前親手整咗張感謝卡畀Eric Sir，答謝對方一直提拔幫助。
