日本女星渡邊直美現身台灣聯同劉以豪、小薰等出席新戲宣傳活動，呢次亦係直美第一次拍寶島嘅電影，佢話劇組嘅大家都好照顧佢，仲學咗幾句台語。被問到會唔會想再拍攝台灣電影時，直美表示目前雖然未有再收到台灣劇組邀約，但係呢次拍攝令佢擁有好多新體驗，尤其係「放飯」文化。
渡邊直美話喺日本係固定放飯時間，但喺台灣就大家一見飯到，就會即刻話「飯來了」，對於大家嚟講，食飯係一件好重要嘅事。
直美同劉以豪開工第一日嘅對手戲就已經係親密床戲，劇情講述佢要將似醉酒嘅以豪扶到床邊，直美就話當時心情非常緊張，但以豪好專業，更大讚以豪身材好又靚仔，成個人都係100分完美。以豪就話自己當時驚訝第一場戲已經係床戲，但以呢個方式關係破冰都好好。
直美偶像徐若瑄亦有參演電影，因為拍攝行程冇重疊，所以直美好難見到偶像。呢次嚟台灣，直美就追星成功，同Vivian聚餐。不過直美就向Vivian表示，自己由細個已經係Vivian粉絲，當Vivian問佢由幾歲開始，佢就話十歲，Vivian即刻叫佢唔好再講。直美大讚Vivian溫柔親切，仲邀請佢一齊清唱「黑色餅乾」經典歌曲，令佢好似夢想成真。