葉蒨文 Sophie 同 曾展望GM 呢對相差5歲嘅姊弟戀，自從喺戀愛綜藝節目《女神配對計劃》成功配對後，一直都愛得大方又纏綿，兩個人無時無刻都派閃光彈，更吸引一班CP粉。雖然有人質疑兩位係咪扮情侶，亦有人認為佢哋經常情侶檔現身，睇得有少少厭，不過都無阻「GPS」嘅情比金堅。
Sohpie曾經分享自己渴望未來同伴侶生兒育女嘅打算，近期佢喺社交平台透露自己有雪卵計劃，即時引嚟網民揣測佢同GM係咪對邁入人生新方向有唔同計劃。Sohpie回覆一篇問各位90後人生規劃同生活嘅文章，佢表示：「1992年！ 勁想要小朋友，但係而家完全唔ready，明白有咗小朋友完全係第二種生活模式，目前仲想過自由嘅生活！ 所以準備去雪卵😆」，仲話自己做緊Research，希望今年或者下年可以做到，到時亦有可能拍片分享心路歷程。
Sohpie呢個留言就吸引唔少網民回覆，有人認為佢知道自己想要咩係一件好事，而且35歲卵子質量會下降，所以雪卵係好事。但亦有人問佢「同GM傾過未？」仲認為係GM未準備好做爸爸，先令Sohpie要雪卵。
Sohpie亦大方回應：「呢個係個人心態嘅問題，同埋準備好步入做家長未，係同另一半無關，因為媽媽係一個好重要嘅職責，而且個生活模式完全會唔同，我自己仲係想體驗人生所以覺得未準備好。」解釋想雪卵同另一半無關，亦表示因為身邊朋友陸續結婚有小朋友，所以明白生活會變得好唔一樣，要準備好先可以成為非常負責任嘅父母。而Sohpie呢個心態亦得到網民讚賞。
