戀愛真人騷《女神配對計劃2》開播第一集已經造成熱話！各位喺海選出現嘅求愛勇者外型同表現都令人津津樂道，花生滿滿。
其中一位26歲，職業冷氣技工、副業歌手嘅中葡芬混血兒方智弘（Oscar），被撞樣似福山雅治、吳偉豪及鳳小岳，一出場已經令主持人阿Bob林盛斌同關嘉敏都流曬口水，被Oscar俊美外表吸引得五體投地，就連社交平台都出現「屋企突然要洗冷氣揮手區」，遠至海外嘅網民都加入洗版，要求Oscar上門整冷氣。最好笑係，就連 吳若希 都對Oscar極為心動，留言：「！！我屋企有冷氣壞呀」」仲話屋企嘅嘢由佢處理開，唔駛麻煩老公Alex。myTV SUPER重溫《女神配對計劃2》眾求愛勇者表現
不過由於Oscar外型太完美，又同朋友組過男團出道，所以有人認為有「做媒」造馬之嫌，但曾經搵過Oscar洗冷氣嘅客人及Oscar舊同事及前老闆都輪流發文力撐佢為人，就連阿Bob都要出Post講返兩句：「原則上佢嘅正職係整冷氣，兼職先係做歌手」、「其實而家呢個娛樂圈，無論係做演員定歌手，好多都有做幾份工作，努力去維持生計，先可以繼續去追夢，因為唔係個個都係最紅嗰啲，所以我真係完全唔覺得有啲咩問題，亦都唔係乜嘢做媒，佢真係自己上網報名參加。」
而Oscar接受電台訪問時，表示自己雖然熱愛唱歌，但現階段喺演藝界依然係新人，幕前收入難以支撐生活，所以洗冷氣係主要收入來源，唱歌就係副業。
佢亦承認節目播出後人氣急升：「我個IG DM係爆咗嘅，起碼有7、800個人話即刻想約洗冷氣。」Oscar亦提到，佢所組嘅男團出道一、兩年都未有太多人認得，結果《女神配對計劃2》播出後，即使只係露面分幾鐘，搭電梯時已經街坊認得佢，仲為佢打氣，令佢受寵若驚。