由 王祖藍 主持嘅新節目《藍朋友・旅朋友》，即將喺9月14號開始同大家見面。呢次節目將會踏足廣西、福州同溫哥華三地，祖藍仲會帶埋太太李亞男以及一班「新朋友」 潘靜文、 劉倬昕 同埋 吳兆麟 一齊出發。
呢次祖藍可以公器私用，同亞男寓工作於拍拖，仲可以順道探下溫哥華嘅一班老友，好似 鍾嘉欣、 岑麗香同 張嘉兒。亞男就話，其實每年佢哋都會返溫哥華見老朋友，呢次最令二人驚訝係拍攝時同老友傾到喊。至於講到夫妻檔拍節目嘅浪漫時刻，亞男就話兩公婆有撐檯腳，祖藍亦有展露廚藝煮飯。
雖然祖藍同亞男嘅細囡年紀細細，不過已經開始對愛情充滿憧憬，祖藍仲話囡囡已經告別由三歲開始到五歲嘅初戀，因為對方疏遠佢，但囡囡宜家已經進入第二段感情。問到如果兩個囡囡十幾歲拍拖會唔會接受到？亞男就話，最重要係囡囡們願意同佢哋分享，唔好收埋收埋唔講。
Sherman、Sam同埋Alan呢次可以跟住祖藍周圍玩、周圍食，佢哋都話大開眼界。不過最令Sherman難忘嘅反而係要同祖藍喺山上唱情歌！Sherman形容感覺好得意，當佢望住祖藍時，最後都係決定望返出去，令大家都捧腹大笑。
關嘉敏 喺戀愛真人騷《女神配對計劃2》擔任花生團成員，當佢見到冷氣技工混血Oscar時即刻露出心心眼，仲忍唔住話：「我屋企嘅冷氣突然壞曬。」呢日Carmen為記招擔任主持，佢亦被泉叔關心屋企嘅冷氣機狀況。Carmen形容Oscar真人靚仔過上鏡，一開始完全冇諗到Oscar咁靚仔。
Carmen嘅感情狀況一直備受關注，雖然由《女神1》到宜家已經一年，但Carmen繼續未有著落保持單身，佢就話目前工作行先。面對大家關心佢會唔會做隱藏女神去踢館，Carmen就好謙虛話今屆女神個個高質，自己會爭唔過，所以做花生團就好。
