好耐冇喺香港出席公開活動嘅范冰冰，身穿金色裙貴氣十足亮相品牌活動，狀態大勇嘅佢不停揮手同大家打招呼，仲大派飛吻。冰冰一向喺女性力量嘅代表，活動上佢亦由女性角度出發，分享自己嘅人生哲理同事業經營之道。被問到點樣保持優雅同魅力時？佢就話主要係大家畀佢嘅愛太多，所以唔想辜負大家嘅厚愛，希望自己堅持用呢種力量去回饋畀愛自己嘅人。
同場仲有韓國男團EXO嘅隊長Suho以及馮允謙，Suho以深藍色西裝現身，吸引大批粉絲到場爭睹偶像風采，Suho亦好親切打招呼同派心心，佢感激粉絲們上次嚟佢哋香港演唱會支持，期待可以再次來港開騷，跟大家見面。
Jay Fung話好開心有機會同冰冰、Suho同場，不過原來爸爸媽媽比佢更興奮，佢亦希望有機會跟Suho交談，睇吓有冇可能喺音樂上面合作。活動上仲見到何超儀同老公陳子聰、鄔友正翁嘉穗夫婦同佢哋嘅大仔Jason，鄔生透露近排搵咗老師準備開始練歌，因為佢嚟緊又要做阿姐汪明荃嘅演唱會嘉賓，屆時會獻唱廣東歌、國語歌同英文歌。
