Twins噚日宣佈12月中將喺灣仔會展舉行一連三場Sidetrack演唱會。呢次開show唔玩紅館大場，蔡卓妍（阿Sa）同鍾欣潼（阿嬌）今次以歌會友，要跟fans嚟個近距離「肩並肩」接觸。
今次扚起心肝開Sidetrack show，阿Sa話以前出咗好多專輯，並非每張專輯嘅歌都可以派台：「入面有好多滄海遺珠、好多好歌，好想趁呢個機會唱番俾fans聽。」對於歌迷笑言佢哋經常「走數」，阿Sa即刻耍手擰頭：「唉！唔關我哋事。」阿嬌亦和議：「嗱！同找數冇關係嘅，係純粹我哋想開。」
呢次選址會展，阿Sa解釋因為Sidetrack，唔想要一個咁大嘅場地，佢笑言驚唔夠人，阿嬌坦言唔擔心：「我覺得Sidetracke嘅歌會係跟得好貼嘅歌迷先會識唱，同埋又可以同大家近距離啲，感覺唔需要太大嘅台面。」
阿Sa提到之前睇過容祖兒Sidetrack演唱會，好鍾意嗰種溫馨感覺，坦言想同fans距離近啲：「今次就攞個中間，唔係細到好似阿祖咁細，又未至於大到好似紅館咁大。」阿Sa話冇刻意向祖兒取經，各有各做，阿嬌就好想有一個以歌會友嘅感覺，阿Sa大讚阿嬌：「你真係講得好好呀，哈哈。」
阿Sa喺歌單方面坦言第一輪選出60多首Sidetrack，再篩選剩40幾多首，阿嬌問道：「我哋要唱幾多首呀？」阿Sa預計二十多、三十首，阿嬌就話：「再加你心軟啦，加多10首，我諗三十幾四十差唔多。」佢哋喺揀歌嗰陣，對佢嚟講全部係新歌，笑言「實在太陌生」。
阿Sa話大概知道fans喜好，「因為我哋每一次開演唱會到最尾點歌嗰一part，有啲歌佢哋永遠重複又重複咁樣點」阿嬌就話有佢哋兩個就夠啦。
演唱會名為「Side by Side」，阿Sa指跟阿嬌二十幾年嚟，二人都係肩並肩一齊去跨過無論係開心定係唔開心，高光或者低谷嘅時候，佢哋都係肩並肩。至於海報賽車手造型，阿嬌就話：「Track（跑道）吖嘛。」阿Sa解說：「落Track呀我哋。即係呢一條路其實一路都係我同阿嬌兩個一齊衝，同埋我哋真係未試過賽車手嘅造型，扮鬼扮馬我哋都扮得多啦。」
