周志康近日雖然忙於拍攝處景劇及準備9月底與中聲戰友開騷，但9月9號原來係阿康同老婆Emily結婚12周年紀念日，兩夫妻同步出Post放閃，阿康展示出幾張攬住同老婆嘅合照。
相中見一張係阿康參加《中年好聲音4》時留影，老婆Emily緊緊貼喺老公嘅胸口，突顯阿康嘅低胸裝，每張相片流露住好Sweet嘅感覺，網民紛紛留言祝賀99快樂，有人大讚周太好似20歲嘅美貎。暖男阿康則留言話：「亞麻婚，繼續多多指教。」
重溫《中聲4》激烈比賽過程
Emily就展示咗兩張當年今日嘅照片，當時阿康送上一大束鮮花，而Emily就喜極而泣，兩人更甜蜜親嘴，並留言：「又一年~ Chain wedding~(解作鏈婚)~當年今日啊。」兩人獲大量祝福。
阿康近年憑住參加《中年好聲音4》人氣回彈，喺賽程中除咗展現唱功，老婆經常帶同一對小朋友支持爸爸，真誠流露咗慈父感覺，暖男形象打動觀眾，比賽完畢後阿康工作接唔停，近日已正式加入《愛回家之三代同糖》劇組，演戲、唱歌雙線發展。
