歷時九個月嘅《中年好聲音4》比賽雖然圓滿落幕，一眾參賽者喺中聲舞台收穫咗好多粉絲，賽後仍繼續寵粉，分享自己生活日常，好似《中聲4》戰友陳旭培突然喺社交平台以「找數」為題，展示咗佢重達206磅嘅肥仔相。
重溫《中聲4》激烈比賽過程
相中身穿短褲嘅旭培身形明顯腿粗肥胖、面部圓咕碌，噸位十足，旭培手持一張「我是坦克」嘅紙牌，同現時嘅佢完全判若兩人，單睇外表真係認唔出係佢。
估唔到旭培曾經係肥仔一名，佢留言話應承得歌迷，始終係要出嚟面對，仲話自己高峰時期2024年時係209磅，當時張相仲要拎住「我是坦克」嘅牌太應景。旭培直指喺《中聲》海選前佢係200幾磅左右徘徊，由最肥至今減咗33至34磅，目前仍須努力，並宣布下個大計。旭培搣甩30幾磅毅力驚人，唔少粉絲要求佢分享減肥妙法。
而季軍鄭家聲終於返到加拿大同親友報喜，步出機場一刻，已經見到大批親友及粉絲等住迎接佢，家聲逐一同佢哋打招呼擁抱，返到加國後，家聲隨即頻頻同好友敘舊。
