梁詠琪Gigi歷時接近兩個月，走遍全國七大城市巡演，上海、杭州、深圳、成都、南京、西安、以及尾站北京，合共26場演出圓滿落幕，期間Gigi嘅好友楊采妮、許茹芸、仲有前輩張艾嘉等特別嚟欣賞演出。
嚟到北京站尾場，Gigi倍添不捨，謝幕一刻哽咽，連續3個幾月朝九晚六一齊排練、食飯、演出，放假時一齊睇表演，過程非常充實同快樂，盼將來能將劇目帶到更多地方。
今年係Gigi入行30年，本來今年計劃好出唱片同做演唱會，當接到話劇邀請時，都有擔心過自己應唔應付到，但想試煉一下自己嘅能力，接受呢個大挑戰。
完成話劇演出後，Gigi而家可以專心留港工作，稍後全情投入製作國語專輯宣傳工作，以及11月底巡演香港站，Gigi話今次真係碌盡人情卡，邀請到過去30年陪伴及見證佢成長嘅重要人物，亮相演唱會，令人期待。
