健康誠諾書丨張慧儀聽養子讀出親筆信 被觸動流淚場面溫馨感人

張慧儀同養子Hanson作客賴慰玲主持嘅節目《健康誠諾書》，Winki同慧儀自從合作演出劇集《女人俱樂部》之後，相隔12年再見面，兩人碰面時話題不絕，由當年傾演技到而家變成傾湊仔經。

慧儀養子Hanson自細患有先天性心臟病，為咗Hanson嘅未來，慧儀花咗過百萬醫療費，令Hanson重拾健康。呢份跨血緣嘅母愛，令Winki非常感動，Winki話母愛係令媽媽做出瘋狂嘅事，而慧儀對Hanson嘅照顧，係比瘋狂更瘋狂。

慧儀覺得呢個就係佢同Hanson之間嘅緣份。Hanson亦喺節目中，讀出一封寫畀媽咪嘅親筆信，藉此表達愛意，而慧儀同Hanson喺過程中都感動落淚，場面非常感人。