王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。泉叔今個禮拜就介紹由韓國電影《哭聲》嘅導演羅泓軫自編自導嘅科幻末日電影《HOPE：逆襲希望港》。
該戲除咗搵嚟黃晸珉同趙寅成之外，仲搵嚟荷里活巨星Michael Fassbender同Alicia Vikander夫妻檔參演，成個電影製作規模已經係荷里活高水平，營造咗一個外星生物降臨地球嘅好刺激嘅氛圍。而有觀眾睇完之後，發覺裡面嘅對白有超過百句粗口，導演就回應話有一半係演員即興發揮，一半係劇本已經有，仲話佢剪片嘅時候已經cut咗二百句㗎喇，面對住外星生物侵襲，可能除咗爆粗冇其他選擇呀！
本身由Andrew Garfield主演嘅蜘蛛俠電影The Amazing Spiderman呢個系列已經好耐無消息㗎喇，但係隨住《蜘蛛俠：不戰無歸》搵返Andrew返嚟，一班蜘蛛粉又再重新集氣希望可以有第三集喇。有消息指，Sony Pictures正係積極考慮緊，喺復仇者聯盟6完結之後，就會開拍第三集嘅The Amazing Spiderman，不過片名就未必會用返Amazing呢啲字眼，大家可能仲要等多兩三年喇。
本周電影新片速遞
《HOPE：逆襲希望港》，一處偏遠小鎮，一則「猛虎出沒」消息，離奇事件急速擴散，某種超乎想像嘅可怕生物正逐步逼近。增援無望，通訊中斷，居民死守防線嘅同時，深入山林嘅搜尋隊卻反遭獵殺。異獸進擊，小鎮警號大響，喺一場關乎生存、信仰同毀滅嘅末世災難中，到底邊個喺度孤軍奮戰，邊個盼望逆襲生天呢？
《巫法闖情關：魔女秘密》，月光之下，魔法甦醒！延續上集劇情，兩大金像影后Sandra Bullock同Nicole Kidman化身奧雲姊妹，誓要同纏繞家族數代、禍及女兒愛情宿命嘅黑暗詛咒，決一死戰。
《我未許願先吹蠟燭》，澳門女孩同嫲嫲蝸居於舊樓天台，來自台灣嘅落魄青年登門追債不成，反同兩嫲孫結交情誼。有日，急需用錢嘅孫女意外執到賭場籌碼，並將其交給青年去落注。萍水相逢嘅兩人，由此展開一場相親又相呃嘅老千行動。
《歡迎來龍餐館》，東北大廚徐福為養家還債，孭住炒鑊走去中東一家中餐館做廚師。佢show出龍抬頭、拔絲地瓜、宮保雞丁等各色中華美食，同前台經理馬俊生一個揸鑊鏟一個吸客，將無人問津嘅龍餐館經營得風生水起！但係戰爭突然爆發，當地局勢急轉直下。亂世之中，各方勢力輪番登場，徐福嘅命運將會何去何從？戰火中嘅龍餐館又將如何維繫？
香港票房龍虎榜截至9月9號中午，第1位《命懸3000呎》、第2位《蜘蛛俠：英雄重生》、第3位《劇場版CHIIKAWA人魚島的秘密》
