資深演員雷宇揚早年拍經典鬼片《陰陽路》系列，其角色形象深入民心，被封為「一代鬼王」，今日傳出雷宇揚喺9月7號因胃癌病逝，終年62歲。雷宇揚近年不幸癌症復發，於廣州低調休養，最終不敵病魔離世。
雷宇揚於1988年讀藝員訓練班畢業後加入TVB，曾做參與綜藝節目主持及參演小配角，後嚟轉戰電影圈及幕後，代表作係經典鬼片《陰陽路》系列，化身神棍、驅鬼大師或靈異事件主角等，加上佢以幽默風格主持電台及電視台主持靈異節目，獲不少影迷支持。
雷宇揚於2012年與細佢21歲嘅內地女主播馬荔結婚，兩人育有一子，將事業重心移往內地，早已長居廣州，淡出香港娛樂圈，轉戰商界發展飲食業，間中與一啲圈中好友拍片放上網。近年雷宇揚屢傳婚變，網民揣測二人已分居，但雙方一直未有回應婚變傳聞。
