鍾嘉欣自2024年宣告復出後，努力兼顧工作同家庭，嘉欣近年頻頻喺大灣區開演唱會，吸引唔少粉絲捧場，最近佢喺演唱會送咗個「忙」俾粉絲而被批評後，又因一段演唱《一人晚餐》嘅影片成為熱話，做出獨特打拍子動作， 又突然敬禮又擺出半邊心心，其舞姿被指突兀，引發唔少網民模仿，但嘉欣好大方，並冇嬲嬲豬噃！
嘉欣喺社交平台上載多張照片並留言：「Joy hides in the little things — and it’s everywhere, if you look 🌼📸 What’s your little thing today? （快樂藏喺細微之處，只要你用心尋找，它無所不在，你今日發現嘅小事係咩呢？ ）」發文，分享連串生活日常點滴，封面相就係嘉欣被仔女攬住嘅一幕，溫馨程度滿分。
嘉欣喺呢個帖文挑選嘅背景音樂正正就係《一人晚餐》，可見佢唔介意呢首歌成為話題之外，亦緊貼潮流熱度，更喺限時動態分享咗一啲網民嘅模仿同彈琴演奏《一人晚餐》嘅片段添！
