鍾麗淇（Margaret）今日（11號）驚傳病危入院，Margaret淡出幕前多年並轉型做瑜珈導師，2010年同混血老公Nardone Ruggero結婚，育有兩名女兒。雖然大女Isabella患上罕見基因病「四號染色體缺損綜合症」，多年積極面對治療，一家四口生活幸福。
近日Margaret同出席「七魔女」成員周家蔚生日聚會時，因其身形暴瘦兼且面容呈現僵硬狀態，令唔少網民關心佢嘅健康情況，擔心Margaret身體抱恙。Margaret好姊妹佘詩曼日前出席活動時，簡單回應兼代好友報平安，叫大家唔使擔心，稱生日會當日Margaret只係流感不適，仲話Margaret有「Doctor Margaret」花名。
今日有報道傳Margaret病危入院，被送往中文大學醫院深切治療部（ICU）留醫，盛傳Margaret遺傳媽媽嘅漸凍人症，而且病發已經有一段日子。另有人爆料稱見到Margaret閨密梁靖琪喺ICU門外守候。
Nardone代老婆接聽傳媒查詢電話，Nardone透露老婆健康情況OK，但面對有傳入院一事，佢支吾其詞，僅講「佢冇嘢喇，OK」便收線。其後Margaret喺社交平台表示收到大家嘅關心，希望尊重佢同家人嘅私隱，唔好揣測佢嘅健康或病情，給予佢哋空間。
