吳沚默（Momo）向來有「TVB才女」之稱，既係編劇亦係演員，更出版過小說。近年Momo將工作重心放到內地，更進軍短劇市場，佢主演嘅短劇《姐姐的反殺時刻》上線後，平台播放量更迅速破億。
風光背後有苦自己知！Momo拍片分享自己嘅橫店叩門跑劇組試鏡嘅辛酸經歷：「如果經理人得閒就陪我，唔得閒就我自己一個去每一個組敲門。一日可以跑四、五、六個組，但大多時候只係遞演員資料、介紹自己，之後就離開冇下文。」
Momo透露最近收到通知，一個志在必得嘅角色已經定角，人選並唔係自己，以及唔少劇組其實早有「內定」安排試戲只係走個流程。
Momo喺片中揭露「潛規則」文化，分享自己喺面試一套電影時，籌備地方喺酒店會議室，當時佢同導演、監製及製片人傾得好好。去到夜晚10點，Momo喺沖完涼後收到該導演微信訊息，邀請佢去「傾劇本」，佢即時拒絕並表示想改為「白天傾」，但Momo隨即收到自稱「導演妹妹」嘅女子來電，力邀佢去房間，仲反問佢「我哋全部人喺晒度㗎，你驚咩啫」。
Momo再次堅拒，激怒嗰位疑似飲醉酒嘅導演，更被對方喺電話辱罵完再拉黑，Momo直言：「其實你話危唔危險？我覺得係唔危險嘅。只要你唔去，冇人可以傷害到你，但呢啲人真係好差囉。」而Momo喺分享喺橫店嘅點滴時，一度講到好感觸而眼濕濕。
