《中年好聲音4》季軍兼人氣王鄭家聲日前舉行粉絲聚會，同一班「愛聲人」聚會答謝大家嘅支持同愛戴。家聲就話如果唔係有大家嘅支持，喺決賽就入唔到TOP 3。
完成比賽後，家聲工作接得密密麻麻，不過佢就抽時間返加拿大。家聲因為比賽放低髮型師工作好長時間，笑言自己收到好多客人私訊想Book佢剪髮，仲有個客為咗等佢，等到由短髮變成長頭髮添！
家聲戰友陳旭培同范子睿喺呢日有嚟祝賀家聲，家聲嘅屋企人更加集體出動撐場。尤其決賽前特登由加拿大飛返香港支持阿仔嘅鄭爸爸同鄭媽媽，見到家聲有咁好嘅成績，佢哋覺得好安慰。兩老感謝粉絲對家聲嘅支持，亦向家聲寄語，希望佢唱多啲好歌俾大家聽，好開心家聲可以實現夢想。
至於家聲就要感謝哥哥完成爸爸期望，有大學學位及成家立室，令佢可以放鬆做其他嘢。而佢亦形容自己藝術細胞係遺傳自媽媽，自己一直得到媽媽支持。