《中年好聲音4》賽事圓滿結束，當中六位動物歌手「企鵝人」周志康、「獅子王」羅天宇、「貓女郎」劉佩玥（阿Moon）、「白羊君」姚兵、「白眉鷹王」莫家淦同樹熊公子「黃建東」一齊作客TVB娛樂新聞台《StarTalk》跟主播許文軒分享參賽點滴，同埋嚟緊開騷嘅準備。
六人以藝人身份參加歌唱比賽，過程難免聽到嘲諷聲音，阿Moon自爆媽咪將佢參賽嘅片收錄喺手機，然後就話佢邊啲位唱得唔好。莫家淦就話賽事過程中，佢起到一個哥哥嘅角色，因為好多素人唔識面對批評聲音，自己可以去勉勵佢哋。
有批評聲音，當然會聽到鼓勵說話，阿康話兩名女兒就冇讚佢唱得好聽，不過見到佢哋喺錄影廠支持自己已經足夠，天宇就話每逢有家人朋友喺現場觀賽，佢就會好緊張，仲會全程迴避同家人朋友有眼神接觸。相反姚兵就有一個遺憾，因為家人未捧過佢場，佢期待遲啲開騷時，太太同阿仔入場欣賞。
六人已開始為演唱會備戰，東東仲話自己構思特別表演，希望令大家對佢改觀，家淦就計劃同姚兵勁歌熱舞，連阿Moon都期待同姚兵有跳舞演出。講到大家都期待阿康同哥哥周志文合體演出，阿康指哥哥工作好忙，唔知道哥哥有冇期，問到是否留畀阿文同阿Moon合作？阿Moon話阿文有好多人爭，即使佢唔上台演出，都會喺台下觀眾捧場。