梁洛施（Isabella）呢日仙氣十足現身活動，心情大靚嘅佢暢談跟三位仔仔嘅相處點滴，仲以大朋友嚟稱呼17歲大仔同兩名16歲嘅孖仔，Isabella話暑假時要陪阿仔玩，或者佢哋跟自己外出開工做吓小助手，而家大朋友們開學後，佢都輕鬆咗。
Isabella話阿仔長大，讀書方面唔使佢點理，不過會保持同佢哋講秘密嘅習慣，問到阿仔會否分享有冇女朋友時？Isabella笑言：「佢哋同我講冇，我都唔知啦！」
Isabella話三位兒子處於好動階段，非常熱愛運動，涉及運動種類好廣泛，包括滑雪、籃球同足球等，三兄弟嘅興趣都唔相似，不過就冇人陪佢打網球，Isabella希望明年可以同阿仔去滑雪。
兒子們有時會跟住媽咪工作，不過Isabella話佢哋對演藝事業冇乜興趣，未諗是否從商，現階段仲未定下目標，而家好好享受讀書生活。問到男友馬浴柯會否陪打網球？Isabella似乎想避談，只表示通常同教練對打。Isabella講到目前工作以電影為主，問到跟馬導合作會否有拗撬，佢就話唔會，大家工作好融洽。