「鬼王」雷宇揚胃癌廣州病逝 曾演《阿Sir早晨》《大頭綠衣鬥殭屍》經典作

有「鬼王」之稱嘅前TVB藝員雷宇揚傳出9月7號於廣州因胃癌病逝，終年62歲，太太馬荔透過雷宇揚好友資深藝人吳志雄對外證實死訊。

據知雷宇揚早年曾患上癌症，經治療後一度抗癌成功，恢復健康。佢喺2012年同細自己21年嘅內地女主播馬荔結婚，婚後育有一子。移居廣州嘅雷宇揚不時喺內地登台，上年曾經公開露面。據知佢近年胃癌復發，生活轉趨低調，鮮有同圈中朋友聯絡。

雷宇揚擁有八分之一英國血統，1988年TVB藝員訓練班畢業後，曾經參演多部電視劇，包括喺《大頭綠衣鬥殭屍》同鄭秀文有好多精彩對手戲，又喺《阿Sir早晨》飾演奸商，更同黎明有唔少對手戲，除咗演出劇集，雷宇揚仲參與多個電視節目。雷宇揚離開TVB後，轉戰電影圈及廣播界，曾演出《陰陽路》系列電影，之後從事幕後擔任導演及監製，2017年執導由方力申主演嘅恐怖片。