李克勤 星期五晚現身校長 譚詠麟 喺紅館展開嘅世界巡迴演唱會—終極篇香港站首場演出，本來於觀眾席支持嘅克勤，仲被校長即場點名，佢更跨欄登台驚喜上演「左麟右李」合體場面。
校長於台上大爆克勤毫無準備、甚至未戴耳機聽唔到拍子情況下「盲唱」，兩人合唱經典金曲《朋友》。而克勤就笑言自己唔止係素顏現身，仲於台下同曾志偉一樣睇到感動落淚，又感性代表歌迷感謝校長多年來帶來無數經典金曲，陪伴大家成長。
除現場力撐老友個唱之外，克勤睇騷前原來出席另一充滿溫情嘅溫馨飯局。佢同1999年一齊參與TVB經典劇《廟街．媽．兄弟》嘅幕後同演員班底聚會，當中包括飾演母親嘅 黃淑儀 劇中兄弟 梁漢文 以及金牌監製潘嘉德，黃淑儀丈夫 徐景清 同克勤太太 盧淑儀 亦一同出席。
相隔27年再次聚首一堂開心話當年，克勤感歎話：「多麼開心的飯局，多麼值得珍惜」，梁漢文亦留言笑指「一坐埋唔知點解好有一家人嘅feel」，相片一出亦隨即吸引大批網民留言大讚經典。
