黃翠如與蕭正楠攜阿仔「蕭哈哈」喺9月初展開一家三口首次馬來西亞外遊，佢哋抵達吉隆坡後，隨即與翠如閨密吳天瑜（Debbie）一家團聚，哈哈與契哥相處融洽，翠如喺社交平台再次分享幸福家庭照，原來為咗影呢張相，佢同阿蕭都付出好大嘅努力。
翠如喺社交平台分享一家三口合照時，感嘆稱為咗影到一張完美世紀合照，佢哋喺雙子塔前，足足影咗接近100張相，先成功挑選出唯一一張最滿意成果。相中見翠如抱住哈哈，對住鏡頭展現無比燦爛嘅笑容，阿蕭則展現暖男式微笑，之不過網民焦點落咗喺「蕭哈哈」身上，大讚哈哈五官簡直完美複製父母最強基因，越大越靚仔。
另一張相見哈哈被媽媽抱起，哈哈好奇指住前方嘅噴泉，翠如眼神充滿母愛，今次除咗陪阿仔，翠如同阿蕭亦難得「解放雙手」過二人世界，二人嘆大馬地道嘅拉茶同Roti Tissue。
而翠如難得跟好姊妹Debbie相聚，佢哋都結伴去蘇丹阿都沙末大廈影閨密照打卡，Debbie亦有陪哈哈玩，二人喺屋企一齊躺喺兒童床傾偈，相中見Debbie牽着哈哈隻手，畫面極其溫馨。
