9月12日係香港一代巨星「哥哥」張國榮嘅70歲誕辰，大批來自香港、內地同世界各地嘅「哥」迷紛紛抵港紀念。 張國榮 生前好友 陳淑芬 連炎輝同前助手Kenneth，12日前往寶福山獻上祝福，日本「哥」迷亦依照傳統以千羽鶴表達思念。
陳太今年特別推出紀念單曲《7o Leslie with Love》，又帶同唱盤造型蛋糕到靈前，寄託對哥哥嘅永恆懷念。
而有商場就舉行倒數活動，《繼續張國榮大熱派對》11號晚順利舉行，三層商場逼爆哥迷，現場透過巨型屏幕，重現哥哥三大經典演唱會精華，又由DJ Tommy帶領逾千歌迷大合唱，倒數迎接哥哥誕生紀念日。
此外，有資深哥迷兼前攝影記者Edward，特別分享當年於電影《星月童話》記者會上，為哥哥同日本女星 常盤貴子 拍攝嘅一張兩人擁抱珍貴合照，Edward早前透過友人協助，聯絡常盤貴子親筆簽名，為哥哥寫下生日祝福，佢亦特別沖印呢張合照予常盤貴子作留念。
當年同偶像哥哥合作拍戲建立友誼嘅常盤，亦於哥哥誕生日出Post，更留言指非常希望再次同哥哥見面，為這份跨越多年的情誼留下極具意義嘅紀念。
