衛蘭 將於11月再踏紅館舉行三場演唱會，已開始為個唱準備嘅Janice，喺9月12號晚突然現身灣仔海旁，擔任樂隊The Flame嘅Busking特別嘉賓，Janice嘅現身頓時吸引大批市民同歌迷圍觀，見到大家熱情嘅反應，Janice當然要用自己把靚聲獻唱經典代表作回饋畀大家，佢先後同樂隊主音 張潔瑩 (Kit) 合唱《心亂如麻》同《大哥》，最後再引領全場觀眾大合唱《就算世界無童話》。
現場高漲熱鬧嘅氣氛，就好似為紅館個唱做咗一次騷前熱身，唔少歌迷同觀眾都將片段上載至社交平台，有人留言形容話偶遇Janice唱Busking，感覺有如置身夢境。而歌迷聽到Janice獻唱三首代表作之後，即時喺網上留言列出自己想喺紅館度聽到嘅心水歌單。
面對歌迷同觀眾咁熱情，Janice相當感動，佢之前提及過，歌迷喺20年前一路陪伴佢走到今日係極之唔簡單，途中雖有起跌，但大家始終給予無限支持。Janice會做足準備再精心挑選歌曲，務求為大家打造一份心滿意足嘅完美歌單。
