《中年好聲音4》當中6位動物歌手「企鵝人」 周志康 「獅子王」 羅天宇 「貓女郎」 劉佩玥 「白羊君」 姚兵 「白眉鷹王」 莫家淦 同「樹熊公子」 黃建東 作客《StarTalk》接受主播 許文軒 專訪。
嚟緊佢哋將會聯手開騷，阿康覺得感覺好似畢業禮，當初佢哋戴面具上台參賽，到今日換轉第二個身份上台獻唱。阿東收到消息有份參與時，直認係驚訝，因為自己係較早時間出局，冇諗過會有參與演出，相反天宇參賽時就期待呢個騷，唔係佢有預知能力，而係佢當時喺廣州睇完阿Moon嘅演唱會，覺得阿Moon好勁，一個人都能夠開騷，覺得他日夾埋阿Moon開騷都唔係難事。
回想當初報名參賽時，各人身上都有包袱，天宇話自己係選美出身，報名參加歌唱比賽會有啲尷尬，雖然佢好鍾意唱歌，但平時喺屋企家人都唔畀佢唱，佢只可以匿喺浴室度唱。
而參加過唔少歌唱比賽嘅姚兵，直指自己都算係選美出身，因為當年嘅歌唱比賽都係睇樣，而佢覺得廿幾年前嘅自己都可以的。阿康亦指自己係靠選美出身，因為當年佢參加歌唱比賽時係冇實力，但又唔敢話自己係偶像派，所以今次就以蒙面方式出戰，希望畀大家睇到佢實力一面。
至於參加過無數TVB賽事嘅阿東，就話曾經掙扎過一段時間，擔心觀眾覺得又見到佢參賽，不過佢自細就好鍾意唱歌，想藉今次機會畀大家知道佢有幾鍾意唱歌。
