《中年好聲音》8位實力唱將到商場舉行新歌巡禮， 顏米羔 曹越 劉曉昆 陳俞霏 黃博 阮慧珊 沈宗賢 同 侯靜伊 現身吸引大批歌迷支持，場面墟冚。各人先後演繹全新作品，又同觀眾大玩遊戲，氣氛高漲。
眾人分別介紹同獻唱全新作品，而獲曾創作張國榮《為你鍾情》嘅王正宇邀請演繹新作嘅 顏米羔 直言非常意外：「我們舊年在一個電影首映相遇，其後王老師喺我演唱會，送上呢首度身訂造歌曲。真係開心到彈上天花板！」不過米羔透露錄音過程並唔順利，因被指哭腔太多，而調整演繹方式後，先有效果最好嘅《子虛烏有》。
至於曹越、劉曉昆、陳俞霏，就演繹全新復古迷幻作品《午夜Ring Ring》，俞霏自爆創作靈感係來自自己誤中騙案經歷：「我之前被電騙呃走19萬幾，身邊亦有唔少朋友中過騙案，相信呢首歌對唔少人都有共鳴。 」
曹越就指成員之間充滿愛：「霏霏包辦曲詞編監，昆昆就教我哋好多跳舞動作，我就參與部份作詞同主力MV創作。 」劉曉昆仲對拍攝MV非常難忘：「30幾度著住西裝褸跳舞拍，真係有血有『汗』，希望觀眾多多支持。」
而黃博對酷熱天氣下拍MV一樣有共鳴：「出動兩部風扇再加雨傘遮擋太陽，都覺得好熱。不過見到MV的效果理想，就好值得。」佢仲透露新歌《花說》歌詞包含唔同嘅花，代表唔同嘅女性，希望歌迷可以愛自己，即使經歷高低，未來都可以笑住走過每一段旅途。」
而被笑指係《中聲》CP嘅 沈宗賢 同 阮慧珊 就獻唱情歌《伽利略的星星》，提到新歌題材，沈宗賢就自爆目前單身憑歌寄意，而 阮慧珊 就感激拍檔支持，佢哋仲希望新歌可以成為婚禮新人主題曲。
侯靜伊 就分享新歌《紅手繩》，佢又講到自己兼任MV導演感受：「最困難係同時間競賽，因為希望節省成本，所以選擇凌晨租場開拍，每個鏡頭都希望一、兩Take完成。雖然最後拍攝時間都比預期超出兩小時，但係效果好滿意，充滿甜蜜感！」
