阮嘉敏 有份參與嘅《女神配對計劃2》播出第二集，Mandy搵嚟好姊妹 鄧伊婷 擔任「閨蜜花生團」，雖然節目上暫未出手為好姊妹提供意見，不過Mandy對好友非常信任，仲話任對方爆料：「我同伊婷完全冇夾過，佢係我入公司後第一個朋友，過去十年我哋互相扶持，咁多年以來佢成日都介紹男仔畀我識，可惜真係唔合眼緣，喺嚟緊未播出嘅節目度，佢會比我更加激動！」
提到節目中有19歲參賽者發表「回春」論時，Mandy就激動話：「始終佢出場只係20分鐘左右，未必可以好完善咁溝通，呢個後生仔諗到咩就講咩，我純粹係當佢搞笑囉。佢本來叫所有女仔『回春』，都唔係淨係指我一個嘅，只係咁啱啲女神撩我互動，特登玩吓！我一向心境開朗，絕對唔需要回春。」
對於介唔介意姊弟戀？Mandy就話鍾意年紀比自己大嘅男士，因為覺得更有有安全感，「如果佢真係好細個，就睇佢係咪真係好有誠意，因為我覺得愛情唔應該受規限，應該要睇吓自己當時當刻嘅感受，我覺得咁先係愛情。
節目中Mandy曾被問到，如參加者曾出軌首要擔心「衞生」問題，被網民直指「好包容」。Mandy就指每個人都有過去，重提舊事冇意義，最緊要拍拖時「乖乖」就得咁話。
《女神配對計劃2》星期日晚 20:30 翡翠台