由 張惠妹 監製嘅大型戶外音樂盛事《東！帶我走》上周末於台東海邊開唱，主辦單位將現場變成全台灣最大型嘅「巨型戶外KTV包廂」，而 杜德偉 應邀擔任壓軸嘉賓，亦係全場唯一演出香港歌手。同場仲包括 信 戴愛玲 Yellow黃宣 9m88 阿妹妹 李玖哲 以及 許茹芸。
首次赴台東演出嘅Alex興奮話，呢次演出同時係一場體力挑戰，佢表演前一晚飛抵高雄後，再轉坐三個小時車抵達台東，隔早隨即投入綵排。面對氣溫逼人，佢用「三合一」形容：「睡眠不足！尚未進食！40度酷熱天氣！」衣衫盡濕嘅佢邊抹汗邊笑稱：「真係有啲中暑感覺，全身濕透，連自己都唔敢掂自己！」
Alex火力全開，先後獻唱《把你寵壞》、《天真》、《無心傷害》、《鍾愛一生》、《情人》、《脫掉》等多首經典作品。全場更變成「七萬人戶外大型卡拉OK」，Alex仲也感性回憶1991年推出《鍾愛一生》時嘅往事，當年自己初出道剛往台灣發展，每次宣傳都遇上炎熱夏天，宣傳服永遠都係「乾了又濕、濕了又乾」，偏偏衫就得一套，而台下歌迷就按捺不住高叫「脫掉！脫掉！脫掉！」笑翻全場。
Alex演出〈脫掉〉前，又化身舞蹈老師，於台上教招牌動作，之後節奏響起，Alex真係「脫掉」西裝外套，之後仲直接操縱巨型水槍向台下狂噴水柱，台上台下一齊享受演出。
