TVB戀愛真人騷節目《女神配對計劃 2》女神郭珮文、陳若思 、何沛珈、俞可程、阮嘉敏，喺最新播出嗰集第一次接觸首輪求愛勇者，今集有唔少筍盤開聲話要追郭珮文，「前男友」俞鋆瑞（Ice）更飛半個地球來港求復合。
郭珮文與Ice曾拍拖近4年，二人因遠距離Long-D，對未來感到迷惘，去年8月決定和平分手，Ice呢次瞞住郭珮文驚喜現身節目現場，更表示每日都掛住郭珮文，面對前度深情告白，郭珮文睇節目直播時都有啲眼濕濕，而一眾女神認同呢部分係最感動。
陳若思話郭珮文與Ice之間充滿好多回憶，彼此經歷咗咁多，何沛珈讚Ice係性格好，同郭珮文好襯，眾女神好支持佢哋一齊。呢集另一個驚喜係吳兆麟勇敢求愛，盼望贏得陳若思芳心，二人曾一齊拍節目，吳兆麟坦言成為同事後，好難越過呢條界線，合作都可能係兩、三個月見一次，通常係一大班人出去食飯。
當何沛珈聽到貌似韓星劉在錫嘅A0純情男講「愛的宣言」，希望將一生一次嘅愛交托到何沛珈手上，仲話想盡快結婚，當主持林盛斌（Bob）問畀幾錢禮金時，A0純情男爽快話：「你話幾多就幾多。」何沛珈受訪時話聽完係有負擔，覺得有啲配佢唔起。
5位女神睇節目就話有啲意猶未盡，而下一集亦有更多求愛勇者登場，女神們承諾第二集節目收視創佳績過20點，監製就會裸跑，何沛珈仲話盡量唔遮重要部位，但阮嘉敏話要打格仔遮樣。
《女神配對計劃2》星期日晚 20:30 翡翠台