《中聲》唱將喺追夢過程中，最期待係擁有屬於自己嘅歌曲，黃博、顏米羔同六位《中聲》老友就夢想成真，呢日一齊出席新歌巡禮，吸引大批粉絲到場支持，黃博更係首次喺商場演繹新歌添！
米羔近期出席新歌宣傳活動均身穿西裝亮相，呢日都唔例外，佢希望之後再出斯文啲歌又可以着西裝。而曹越、劉曉昆同陳俞霏就組粉紅泡泡跳唱組合，令在場觀眾眼前一亮，曹越覺得三人首次合作由零開始到新歌MV製作過程，大家擦出唔同火花，整體感覺好好，昆昆笑指三人都有啲「戀愛腦」，曹越就話大家都係可愛嘅女人，一定要着粉紅色。
阮慧珊同沈宗賢推出新歌，佢哋應粉絲要求，嚟緊出粵版《伽利略的星星》，目前已寫緊詞，而侯靜伊預告《紅手繩》將跟師兄黃劍文合作，唱出一個清新合唱版本畀大家聽，希望有機會推出完整版。
