新生代女歌手 KALAI家麗星期一唔止迎接28歲生日，更宣布加盟 陳奕迅 創立嘅音樂廠牌EAS MUSIC，成為旗下首名女歌手。首支派台作品《THAT’S HOW WE MOVE》亦同步推出舉行新歌發布會，老闆 Eason 亦親身撐場，分享音樂路心得同送上生日蛋糕同鮮花，見證KALAI踏入全新階段。
KALAI以Rapper身份出道，但一直喜歡唱歌，過往就經常請教Eason，Eason更曾為佢其中一首作品擔任Vocal Producer，令佢獲得唔少啟發。KALAI又笑指同「陳家」嘅緣分非常有趣，她最初先認識徐濠縈，後來同 陳康堤 成為朋友，之後又有份參與Eason《Fear and Dreams》世界巡迴演唱會。
KALAI又曾獲 鄭秀文 邀請擔任巡迴演唱會固定表演嘉賓，7月又參與《陳輝陽作品演唱會》同小肥一齊演出。更曾獲唔少品牌邀請參與活動。2020年以獨立歌手身份出道至今嘅KALAI，一直親自參與作品曲詞創作同製作，已先後推出唔少作品。
呢次發布會KALAI嘅大批圈中好友都到場支持，一齊見證KALAI呢個重要時刻。KALAI一連演繹三首歌曲，包括加盟EAS MUSIC後首支派台作品《THAT’S HOW WE MOVE》。演出後Eason更上台同佢對談。
KALAI話：「以前好多嘢都係自己處理，而家咁多同事一齊幫手，可以令作品質素再提高，亦可以同更多自己一直想合作嘅音樂人做歌。」仲話Eason同團隊給予極大創作自由，唔會改變原本音樂方向。
Eason就提醒佢加入唱片公司之後最重要嘅係保留原有個性：「好多獨立歌手簽咗Label之後，個感覺可能會有所改變。我希望你一路進化，但唔好唔記得自己，最主要嗰個core係點，呢樣嘢要keep住。」