容天佑最近忙於為TVB處境劇《愛‧回家之三代同糖》開工，今年5月升呢做新手爸爸，早前聘外傭姐姐幫忙照顧愛女「澄澄」，點知外傭姐姐趁容太WInnie離港出差，精心部署走佬，容天佑收工返屋企，已發現外傭姐姐不見蹤影！
容太WInnie噚日喺社交平台曬出一張朦朧嘅合照，相中隱約見到容天佑一家三口同外傭姐姐，WInnie大吐苦水透露自己離港第1日，老公容天佑夜晚11點收工，見外傭姐姐唔喺屋企，幸好WInnie出發前，一早安排愛女去外婆屋企暫住。
容太WInnie即時聯絡對方，睇吓佢係咪安全冇事，但外傭姐姐已讀不回，到第三日終於回覆，聲稱自己一直喺香港，要求等女顧主返港先解釋，跟住有另一個香港人拎咗外傭姐姐個電話講，「hello我喺香港國際機場嘅地勤人員，你姐姐飛咗去某一個地方，但係俾人遣返咗，所以姐姐唔知道依家應該去邊」，只好叫外傭姐姐去中介公司度等安排。
其後外傭姐姐透過中介公司要求容太「即刻買機票」，俾佢翌日返回菲律賓，WInnie慨嘆而家請工人真係好難，請到好工人真係要好好珍惜，僱主太冇保障，WInnie更發現「File入面嘅合約又唔見埋 ，希望一個月後唔會收到收數公司嘅信啦」，仲話而家先知道原來請一個未嚟過香港嘅外傭姐姐，其實對方都有機會曾經嚟香港打工，對方可以改名、改生日日期，然後可以重新簽證嚟香港做嘢。
WInnie同時抱怨呢位外傭姐姐平日工作態度極差與欠缺衛生，憶述外傭姐姐預謀走佬嗰日，BB房淪為恐怖「蟻竇」情景，「佢個櫃入面已經冇乜嘢，淨係留咗一杯飲剩嘅咖啡同埋食咗兩啖嘅方包擺咗喺枱面。當然，佢本身諗住走佬嘅話，我唔會想佢返屋企……佢喺BB房倒瀉咗咖啡，冇抹返乾淨，仲惹到成地都係蟻，所有尿片同其他BB嘢都佈滿蟻，牆上面同地下已經有漬同埋好臭。基本上所有尿片都唔用得，成間房要反轉重新清潔，滅走晒啲蟻」。
