中聲歌手 黃博 近日推出今年第二首單曲《花說》，新歌同江暉聯手作曲，並由喬星填詞，更邀請到大師級資深音樂Ted Lo編曲。歌曲以花朵作為比喻，傳遞出每位女性就好似唔同嘅花一樣，各自擁有獨一無二嘅優點、美態以及價值，鼓勵女性要自愛自強，勇敢活出屬於自己嘅美麗人生。
博博好榮幸新歌擁有呢個豪華製作班底，而喺MV中，佢就以說書人姿態登場，串連三個唔同背景嘅女性，喺大都巿中自強、自我救贖嘅故事。博博更邀請喺劇集《正義女神》反串少年殺人犯「高成彬」而人氣急升嘅劉倬昕演出MV：「真係好多謝佢，因為係佢第一個拍嘅MV，中間佢雖然戲份唔算好多，但係佢情緒投入度係好高，好有情感嘅感染力感覺，其實三個故事女主角都演得好好，令到MV故事更加豐富、生動，大家可以加深對歌曲嘅理解。」
新歌用花做主題，原來博博自小已經喺「花園」中長大，因為父母都好鍾意花，媽媽亦好鍾意買花做擺設。至於要用咩花代表自己？博博就笑言每日都會有唔同：「好似去沙灘拍《花說》MV嗰日係酷熱天氣，我就想變咗喺水中嘅睡蓮，嗰日同粉絲搞活動，見到好多粉絲心情好溫暖，佢哋出現就好似滿天星咁樣陪伴我。」
日前博博更喺餐廳舉辦活動，同粉絲聚會之外更宣傳新歌，活動仲有甘永傑幫手擔任主持。博博除咗現場演繹新歌，仲親手以花朵做飲品同甜品俾粉絲品嚐，而當日博博準備嘅另一個驚喜，就係公開十幾年前嘅工作照，目標就係想呼應MV中嘅故事：「每個喺城巿生活嘅人都會有唔同階段嘅面貌，想將呢啲唔同感覺嘅相分享畀大家睇吓。」而大家見到博博呢批青澀舊照後，都大讚佢似足高中生，非常年輕。
