吳建豪日前現身北京，參與室內體能耐力賽HYROX賽事，呢項比賽自興起後吸引無數健身愛好者參與，但喺9月12號賽事就有一位澳洲籍女參賽者Joanna Wietrzyk喺比賽過程失禁，但Joanna仍然「糞勇向前」，最終奪冠。
但由於Joanna嘅排泄物沾污場地同器材，令唔少人都為其他參賽者擔心，更有唔少人都誤以為VanNess係12號參賽，所以都紛紛湧入VanNess嘅社交平台留言「不知道他踩到了沒」、「沒被弄到吧」、「屎到臨頭」，但VanNess其實係14號先參賽，而且主辦單位已徹底清潔場地，並消毒所有器材。
VanNess同隊友最終以1小時11分53秒完賽，佢仲喺社交平台分享多張爆肌參賽相，唔少粉絲都讚有高度自律性，即使已經48歲但仍然維持到最佳體態。而VanNess亦曾經分享，去年10月聽到李玖哲、瘦子等朋友講起呢個健身賽而引起佢好奇。第一次訓練後嘅強度令佢印象深刻，亦開始研究各個項目嘅技巧，最後決心參賽。VanNess仲話，自己膝頭有舊傷，需要持續復健，加上進行緊巡回演唱會，要兼顧工作同訓練，都用咗唔少時間，最後只係練咗3個月，以完成比賽為目標。
