前組合Cookies嘅不和風波傳足咁多年，近日傅穎（現名：傅寶誼）重提昔日被舊隊友孤立，更遭鄧麗欣（Stephy）圈外好友喺網上公開批評佢「天生唔識同人社交又高敏，冇朋友都要好好學下同人溝通。」即使Stephy事後公開回應，表明朋友言論不代表自己立場，划清界線之外亦代友道歉，但九餅之間嘅是非亦再度成為網上熱話。
而Stephy近日喺社交平台分享自己嘅健身片，配文仲話：「做尖片，通常都緊係剪d好似做得好好果d啦。而硬撐完最後一下果種難以自控，你明唔明？今次真係相由心生，你睇我個樣幾猙獰。同教練講數嘅重要性，不如8下算啦好嘛。禮貌而不失優雅的微笑，大大力飲水」
帖文一出，唔少人都質疑Stephy寫「相由心生」、「不如8下算啦好嘛。」、「禮貌而不失優雅的微笑。」係句句有骨，疑忿忿不平有所隱喻，引發網民洗版式留言，認為Stephy神情氣質大變，仲話「你越嚟越似區文詩。」、「真係好似區文詩化咗。」、「睇完好難唔信你冇欺凌。」亦有人翻出楊愛瑾過去接受電台訪問時嘅片段，當年Miki大方承認同Stephy、吳雨霏排擠過Theresa，所以大家宜家再睇返Stephy呢個Post，都更傾向認為佢係別有喻意。
