由彭氏兄弟執導、 何超儀 主演嘅嘅奇幻懸疑電影《拾荒法師》，獲選為2026年曼谷國際電影節Midnight單元開幕電影，成為該單元首部香港華語嘅開幕之作。
超儀同監製兼丈夫 陳子聰 演員Iman Taheri，以及電影團隊出席開幕儀式。超儀以一身透視花仙子禮服走上紅地氈，得到紅地氈主持人連連大讚「Gorgeous」。超儀更表示到泰國參展心情興奮，又即場騷兩句泰文。而紅地氈沿途都有唔少影迷守候，超儀主動上前同大家握手又自拍，非常親切！
今屆開幕禮最矚目嘅時刻，就係泰國皇室成員烏汶叻公主殿下親臨典禮，向多位喺國際影壇有傑出成就嘅電影人頒贈紀念品。公主登場前，所有嘉賓須先到後台隱蔽處模擬綵排。皇室禮儀專員同軍隊保安當場示範並逐一指示，不論係步行速度、停步位置、彎腰受禮嘅角度。超儀依指示反覆練習，事後仲笑言當時為求走動方便，腳上穿着波鞋，只靠長裙遮掩，希望公主唔會察覺。
而公主駕到時保安嚴密，出席者都唔可以用相機或手機拍攝，全程由皇室官方指定攝影師記錄。超儀按禮儀接受頒贈，而紀念品就係一枚設計別緻嘅心口針。儀式過後，超儀興奮喺社交平台展示心口針，仲話唔捨得戴，會將佢擺喺屋企收藏，同歷年獎杯放埋一齊。而超儀更係首位獲得榮耀嘅香港演員，呢個殊榮對佢嘅藝術貢獻表示高度肯定，亦為劇組帶嚟鼓舞。
