洪卓立 同 許靖韻 日前分別喺東莞舉行音樂會，兩位呢次唔只落台同觀眾握手近距離互動，更大派福利為幸運兒觀眾送上親手製作嘅花燈，現場氣氛熱鬧又溫馨。
Angela今次帶新歌到東莞演出，原來呢首歌係喺開騷前一個星期先錄，佢都好感謝公司支持以及同事幫手趕工，至嚟得切喺東莞開騷唱俾大家聽。Angela表示：「我每次都會搏盡，當每次都係最後一次。」充份表達出佢對舞台嘅認真。
而阿Ken就自爆騷前喺屋企閉關沉澱咗十日，期間謝絕打擾，務求以最佳狀態示人，佢解釋：「我唔想齋唱，而係想將每隻歌嘅故仔分享俾大家聽。雖然新歌趕唔切今場，但期待Part 2可以帶多啲新歌俾大家。」
巡迴音樂會東莞站完結後，佢哋就會正式進入小休息期，仲話期待2027年Part 2帶嚟更多新作品俾觀眾，請大家拭目以待。
至於今次嘅送花燈環節，原來有段故！兩位上次去到東莞宣傳期間，就去咗一間非物質文化遺產嘅老店，學習製作花燈，更各自整咗一個俾幸運觀眾。呢份心思唔只應節，更有滿滿誠意，令大家都好受落。