陳法拉 執導嘅第二部短片《Bloodline 血脈》於多倫多國際電影節（TIFF）中進行世界首映，現場唔少觀眾都被嚇到尖叫，令法拉相當開心：「看到大家被嚇到的樣子，我很開心，就像嚇到小朋友一樣有趣。」
短片講述兩名美國華人兄妹深入沙漠，尋找第一代赴美開荒祖先留低嘅寶藏，但佢哋所搵到嘅嘢卻遠超預期，身為導演嘅法拉就幽默地提醒觀眾：「所以真的不要出去挖祖墳啊，千萬不要！」由於短片背景設定於1952年，法拉指喺19世紀華人赴美時，曾遭受到唔少歧視與屠殺，到咗 50 年代又經歷到不同嘅對待，所以佢想透過電影重現這段歷史。加上法拉一直想拍攝壯麗嘅西部風景、荒漠與牛仔嘅元素，於是佢就將「年代劇」與「西部片」兩個元素結合。
法拉透露拍攝時用嘅古董道具車突然死火，於是佢即刻叫停，帶領團隊點香拜神：「拜完神後繼續拍攝，涉及恐怖情節時大家都感到很安心，最終拍攝過程也非常順利。」
去年法拉以演員身為出席多倫多電影節，而今年則以導演身份出席，法拉笑言由於今年自己係「帶隊」嘅關係，所以要照顧整個團隊，處理所有雜務，令佢笑言覺得自己似「阿四」。
